සංක්‍රාන්තිය හෙවත් සොංක්‍රාන්

සියළු දෙනාටම සාමය සතුට පිරි සුභ නව වසරක් වේවා !

මේ දවස් වල හරිම ගිරීස්මෙ. තායිලන්තෙ ඉතින් කවදත් ගින්දර වගේ රස්නෙයි තමයි. ඒත් මේ දවස් වල ඒක ඩබල් වෙලා වගෙ. ඒ නිසාද කොහෙද මේ දවස් වල මෙහේ අපූරු ක්‍රීඩාවක් වෙනව. ඒ තමයි වතුර ගැසීමේ සටන.

පාරෙ එහෙ මෙහෙ යන ඔනෑම කෙනෙක්ට, වයස් භේදයකින් තොරව වතුර බාල්දියකින් සංග්‍රහ කිරීමට පාර දෙපස මිනිස්සු සැදී පැහැදී ඉන්නව. පොඩි එවුන්ට නම් මේක හරිම ජොලි කාලයක්. හැම තැනම දුවලා පැනල දකින ඕනම කෙනෙකුට water gun එකෙන් වෙඩි තියන එක තරම් තවත් ‍‍ජොලි වැඩක් තියනවැයි ?

මට මතකයි පොඩි කාලෙ මම වතුර එක්ක සෙල්ලම් කරොත් අම්ම බනිනව "මොකද, හෙම්බිරිස්සාව හදාගන්නද හදන්නෙ.." කියල. ඒත් මෙහේ අම්මල නං පොඩ්ඩන්ට විවිධාකාර water guns අරන් දෙනව මේ දවස් වල. මට පොඩ්ඩක් ඉරිසියයි..

අප්‍රේල් 13 සිට 15 ‍තෙක් මෙහේ නිවාඩු. මේ නිවාඩුවට කියන්නෙ සොංක්‍රාන් කියලා. ඉතින් පවුල් පිටින් වාහන වල නැගල විදි සංචාරයේ යනව වතුර ගහගන්න. බැංකොක් වල කඔසාන් වීදිය (kao san street) මේ සඳහා විශේෂයි. විදේශීය සංචාරකයිනුත් මෙම වතුර සටනට බොහෝ ප්‍රිය කරනව. නිකං වතුර, අයිස් වතුර, සුවඳවත් කළ වතුර ගැසීම ව‍ගේම වතුරේ දියකළ පවුඩර් වලින් මුහුණු පාට කිරීමත් මම අත්දැකපු දේවල්. හැබැයි අපේ සමහර අයියල තරහට කරනව වගේ ගොම දියකළ වතුර හෝ මඩ වතුර ගැසීමක් නම් මෙහේ වෙන්නෙ නෑ.. මොකද මේ සියල්ල කරන්නෙ විනෝදය සඳහනේ..

නමුත් මේ සැරේ කඔසාන් වීදිය වසා ඇති බව දැනගන්න ලැබුනා. ඊට හේතුව මම කලින් කියපු මේ දිනවල පවතින දැවැන්ත උද්ඝොෂණයයි. ඒත් වතුර ගැසීම නං අඩුවක් නැතිව හැම තැනම දක්නට ලැබුනා.

මොකක්ද මේ සොංක්‍රාන් වල නියම අරුත කියල නම් නූතන තායි තරුණ තරුණියන්ට කිසී වැට්‍හීමක් නැති ගානයි. ඒක හරිම කණගාටුවක්. ඇත්තටම මෙහි නියම අරුත අපේ සිංහල අවුරුද්ද හා සමානයි. සොංක්‍රාන් යනු සංක්‍රාන්ති සමයයි. අපෙ වගේම මෙහෙත් සාම්ප්‍රදායිකව සොංක්‍රාන් සමරන්නෙ ගම්බිම් බලා යෑමෙන්, ගේ දොර අළුත් වැඩියා කිරීමෙන්, වැ‍ඩ්හිටියන්ට අචාර කිරීමෙන් ආදියෙන්. මේ දිනවල තායි පන්සල් වල කෙරෙන චාරිත්‍රයක් වන්නෙ බුදු පිළිම සුවඳ පැන් වලින් දොවනය කිරීමයි. ඒ වගේම හාමුදුරුවන් වහන්සේල මිනිස්සුන්ට පිරිත් පැන් ඉසිනව. වතුර ගැසීමේ චාරිත්‍රයේ මුල මෙය විය හැකියි.

මොකද කියන්නෙ ? අපිත් පටන් ගමුද වැඩේ ? ;)

තායිලන්තයේ අවුල (2 කොටස) - කහ කමිසයේ කතාව

මුල් ලිපියෙන් මම තායිලන්තයේ මේ දවස් වල තියෙන ලොකු උද්ඝොෂණයක් ගැන ලියුව මතකනෙ ? ඒ වගේම මේ දවස් වල රතු කමිස ව‍ගේම කහ කමිස ඇඳීම එච්චර හොඳ නැති බවත් කිවුවනෙ. මොකක්ද කහ පාට කමිසයේ තියෙන විශේෂත්වය ?

මීට අවුරුදු කීපයකට කලින් සඳුදදා දිනයන් වල මෙහෙ හරි අපූරු දෙයක් දකින්න තිබුනා. ඒ දවසට හැමෝම වගෙ ඇන්දෙ කහ පාට ඇඳුම්. තායිලන්තෙ මිනිස්සු තමන් අඳින පාට තීරණය කරන්නෙ ලස්සන ගැන විතරක්ම හිතල නෙමෙයි. කහ පාට නියෝජනය කරන්නෙ රජතුමා. ඒවගේම මිනිස්සු රජතුමාට බොහොම ආදරය කළා. එනිසා සෑම සඳුදා දිනයකම කහ පාටින් සැරසී ඒ බව පවසා සිටියා.

තත්වය මෙසේ වෙත්දී 2005-2006 සමයේ තායිලන්තයේ අගමැතිව සිටියේ තක්ෂින් සිනවත්‍රා ද ගම්බද ජනතාව අතර ජනප්‍රසාදයට පත් වෙන්න පටන් ගත්නව. එයට හේතු වුනේ මෙතෙක් කල් දුශ්කර ගම් පළාත් වෙත ලඟා නොවූ දළිඳු කම තුරන් කිරීමේ වැඩසටහන්, සෞඛ්‍ය පහසුකම් වඩ වඩාක් ඒ ජනතාව කෙරෙහි රැගෙන යාමට ඔහු ‍ගත් ක්‍රියාමාර්ගයි.

ඒ කෙසේ වෙතත් මේ වෙනකොට තවත් කණ්ඩායමක් තක්ෂින් ගේ ආණ්ඩුවට චෝදනා එල්ල කරන්න පටන්නව. ඔවුන්‍ ප්‍රකාශ කරන්නෙ ආණ්ඩුව හරිම දූෂිත බව සහ තක්ෂින් රජතුමාට පක්ෂපාත නැති බවයි. මෙම කණ්ඩායමේ නම People's Alliance for Democracy (PAD) හෙවත් ‘ප්‍රජාතන්ත්‍රවාදය සඳහා වූ ජනතා සන්ධානය’. නමුත් මෙම සන්ධානය පසුපස සිටින්නේ ‍බැන්කොක් නගරයේ ඉහළ මධ්‍යම පන්තිය සහ රජුට ඉතා හිතවත් පිරිස් බව මට ඇතැම් අය පවසන‍වා. PAD පිරිස තම ලකුණ ලෙස තෝරාගන්නේද ර‍ජතුමාගේ පාට වන කහ පාටමයි. එනිසා මේගොල්ලො කොච්චර ‘ප්‍රජාතන්ත්‍රවාදී’ ද කියල ‍හිතාගන්නකො..

කොහොම හරි මේ පිරිස උද්ඝෝෂණ කිරීමත් හා සමඟ හමුදා කුමණ්ත්‍රණයක ප්‍රථිපලයෙන් ආණ්ඩුව විසුරුවනු ලබනව. නමුත් 2007 මහ මැතිවරණය ජයලබන්නේ නැවතත් තක්ෂින්ට පක්ෂපාතී කණ්ඩානම්. ඉතින් අපේ ‘ප්‍රජාතන්ත්‍රවාදී’ කහ කමිස කාරයො නැවතත් වීදි බහිනව එම ආණ්ඩුවට එරෙහිව ප්‍රචන්ඩව. ඔන්න ඔය වතාවෙ තම‍යි අර බැන්කොක් ස්වරණභූමි ගුවන් තොටුපල සතියක් වසා තබන්න වුනේ(2009) මේ කට්ටිය නිසා.

ඒ වතාවෙ ඉතින් විවිධ බලපෑම් මත නැවතත් ආණ්ඩු වෙනසක් ඇතිවී කහ කමිස කාරයන් බලාපොරොත්තු වූ කෙනා අගමැති වෙනව. ඔන්න ඉතින් ඔහොම තමයි රතු කමිස කාරයො එළියට එන්නෙ..

මේ නිසා දැන් වැඩි පිරිසක් මේ පාට දෙකම ඇඳීමෙන් වැලකී සිටිනව.. ඔන්න මම සරළව විස්තර කරා.. තේරුනාද මන්දා. වැඩි විස්තර ඕනෙනම් විකිපීඩියා එක බලන්නකො පහත දැක්වෙන ලින්ක් වලින්..

http://en.wikipedia.org/wiki/Thaksin_Shinawatra

http://en.wikipedia.org/wiki/Thailand_political_crisis_2005-2006

තායිලන්තයේ අවුල

මම මේ දවස් වල ජීවත් වෙන්නෙ තායිලනතෙ. ඊයෙ දිනයෙ සිට බැන්කොක් නගරයේ දැවැන්ත උද්ඝෝෂණයක් ක්‍රියාත්මක වෙනව. ඒක මෙහෙයවන්නෙ "අඥාදායකත්වයට එරෙහිව ප්‍රජාතාන්ත්‍රවාදය සදහා වූ එක්සත් ජාතික පෙරමුණ" හෙවත් "National United Front of Democracy Against Dictatorship" සංවිධානය. මේ අයගේ සංඛේතය තමයි රතු පැහැති කමිසය. මේ උද්ඝෝෂණ‍යෙ අරමුණ බැන්කොක් නගරයේ කටයුතු අඩපන කර හැකිනම් ආණ්ඩුව පෙරලා දැමීමයි. මේ සදහා ඔවුන් මුලු රටේම විසිරී සිටින සිය සා‍‍මාජිකයින් සියළු දෙනා මෙහි කැදවා තිබෙනවා. මෙම ලක්ෂ සංඛ්‍යාත පිරිස නිසා නගරයේ කටයුතු අවුල් ජාලයක් කිරීමට මොවුන් බලාපොරොත්තු වෙනව.

ඡායා රූපය ගත්තේ මෙතනින්

මේ රතු කමිස කණ්ඩාය‍ම සහයෝගය දක්ව‍න්නෙ මෙරට හිටපු අගමැති තක්ෂින් සිනවත්‍රාටයි. ඔබ දන්නවා ඇති 2006 වසරේ සිදුවූ හමුද‍කුමණ්ත්‍රණයකි තක්ෂින්ගේ ආණ්ඩුව විසිරුවනු ලැබුව. ඔහු තාමත් ජීවත් වන්නෙ රටින් පිටයි. සමහර අය කියන හැටිහට මෙම කුමණ්ත්‍රණය පසුපස සිටියෙ මෙර‍ට රජතුමාට පක්ෂපාතී සාම්ප්‍රදායික පාලක පැළැන්තියයි. නමුත් මෙරට ගැමි ජනතාව සහ ශිෂ්‍ය ප්‍රජාව අතර තක්ෂින් කෙරෙහි පැහැදීමක් ඇති බ‍ව පේනව. අද සිදුවීමට ආසන්නම හේතුව, පසුගියදා නඩු තීන්දුවකින් තක්ෂින් ට අයත් දේපළ අති විශාල ප්‍රමාණයක් රාජසන්තක කිරීමයි. එයට හේතුව ලෙස ආණ්ඩුව පැවසුවේ තක්ෂින් අගමැතිව සිටි කාලයේ ඔහු අසාමාන්‍ය ලෙස ධනවත් වූ බවයි. (අපෙ රටේ නම් ඉතින් ඒක සාමාන්‍ය දෙයක් නෙ නේද?) කෙසේ වෙතත් ඔහු ඉතා ධනවත් ව‍්‍යාපාරිකයෙක්.

මේ රටේ දේශපාලනය අපේ රටට වඩා බොහොම වෙනස්. ඒක තේරුම් ගන්න ටික කාලයක් මෙහෙ ජීවත් වෙන්නම ඕනෙ. ඒ පිළිබද සවිස්තරව මම වෙන දවසක ලියන්නම්. ‍

අද බැන්කොක් නගරයේ විදේශියෙක් වශයෙන් මට දැනුන එකම වෙනස පාරේ තදබදය වෙනදාට වඩා අඩු වීමයි. නමුත් මම උද්ඝෝෂකයින් ගැවසෙන ස්ථාන වලට නම් ගියේ නෑ. ‍

මේ දිනවල බැන්කොක් එනවනං එක දෙයක් මතක තියාගත්තොත් ‍හොදයි. තනි රතු හෝ තනි කහ පාට කමිස එච්චර නුවණට හුරු නෑ.. ආ.. මොකද කහ පාටෙ තියන අවුල ? හිඃ හිඃ.. ඒ ගැන පසුව..

මගේ ප්‍රථම සටහන‍‍‍

හා හා පුරා කියා මමත් සිංහල බ්ලොගයක් පටන් ගත්ත. අද සිට ම‍ගේ හිතට ගලාගෙන එන විවිධ අදහස් හැකි සෑම මොහොතකම ලියන්න තමයි අදහස..

මෙය කියවන ඔබ සියළු දෙනාගේ අදහස් උදහස් මෙහි සටහන් කරන්න..